మహబూబాబాద్, మే 28: మహబూబాబాద్ జిల్లాలోని కుమ్మరికుంట్ల సమీపంలో రైతుల ఆందోళన ఉదృతంగా కొనసాగుతోంది. తీవ్ర వర్షాల కారణంగా ధాన్యం తడిసిపోయిందని, అయితే ప్ర
మహబూబాబాద్, మే 28: మహబూబాబాద్ జిల్లాలోని కుమ్మరికుంట్ల సమీపంలో రైతుల ఆందోళన ఉదృతంగా కొనసాగుతోంది. తీవ్ర వర్షాల కారణంగా ధాన్యం తడిసిపోయిందని, అయితే ప్రభుత్వం ఇప్పటికీ కొనుగోలు చేయకుండా నిర్లక్ష్యంగా వ్యవహరిస్తోందని ఆరోపిస్తూ రైతులు రోడ్డెక్కారు. దంతాలపల్లి-సూర్యాపేట ప్రధాన రహదారిపై ధాన్యబస్తాలతో ఆందోళన చేపట్టారు.
“తడిసిన ధాన్యాన్ని కొనుగోలు చేయాలి, మా పంటలు పాడవుతున్నాయి, ప్రభుత్వం మాకు అండగా నిలవాలి” అంటూ రైతులు నినాదాలు చేశారు. గత కొన్ని రోజులుగా వర్షాలు భారీగా కురుస్తుండటంతో రైతులు కొనుగోలు కేంద్రాలకు తీసుకొచ్చిన ధాన్యం పూర్తిగా తడిసిపోయింది. చాలా చోట్ల తడి ధాన్యం నిల్వచేసే ఏర్పాట్లు లేకపోవడంతో పంట నష్టపోతుందనే ఆందోళన రైతుల్లో నెలకొంది.
ప్రభుత్వం ధాన్యం కొనుగోలుకు స్పష్టమైన మార్గదర్శకాలు ఇవ్వకపోవడంతో, అధికారులు తడిసిన ధాన్యాన్ని తిరస్కరిస్తున్నారని రైతులు ఆరోపిస్తున్నారు. “వర్షాల సంగతి తెలిసి కూడా తగిన ముందు జాగ్రత్తలు తీసుకోకుండా, కొనుగోలు కేంద్రాలు నిర్లక్ష్యంగా వ్యవహరించాయి” అని ఓ రైతు వాపోయారు.
ప్రభుత్వం వెంటనే స్పందించి తడిసిన ధాన్యాన్ని పూర్తిగా కొనుగోలు చేయాలని, లేకపోతే రాష్ట్రవ్యాప్తంగా ఉద్యమాలు తీవ్రరూపం దాల్చుతాయని రైతులు హెచ్చరిస్తున్నారు. మరోవైపు, వ్యవసాయ శాఖ అధికారులు పరిస్థితిని సమీక్షిస్తున్నామని, రైతులకు నష్టపరిహారం అందించే విషయాన్ని కూడా పరిగణనలోకి తీసుకుంటామని వెల్లడించారు.
రైతుల ఆందోళనతో సంబంధిత రహదారిపై ట్రాఫిక్కు అంతరాయం ఏర్పడింది. పోలీసులు రంగంలోకి దిగి రైతులతో చర్చలు జరిపే ప్రయత్నం చేస్తున్నారు. వ్యవసాయ ఉత్పత్తుల కొనుగోలులో జాప్యం వల్ల రైతులు పడుతున్న ఇబ్బందులను అధికారులు తక్షణమే పరిష్కరించాలని రైతులు డిమాండ్ చేస్తున్నారు.
COMMENTS