బీహార్ ఎన్నికల్లో పోలింగ్ కంటే ఎక్కువ లెక్కలు ఎందుకున్నా? ఈసీ గణాంకాల్లో వ్యత్యాసాలపై పరకాల ప్రభాకర్ లేవనెత్తిన ప్రశ్నలు, వివాదం వివరాలు. Bihar 2025
బీహార్ ఎన్నికల్లో పోలింగ్ కంటే ఎక్కువ లెక్కలు ఎందుకున్నా? ఈసీ గణాంకాల్లో వ్యత్యాసాలపై పరకాల ప్రభాకర్ లేవనెత్తిన ప్రశ్నలు, వివాదం వివరాలు.
Bihar 2025 Election Results Analysis: బీహార్లో జరిగిన తాజా అసెంబ్లీ ఎన్నికలు దేశవ్యాప్తంగా తీవ్రమైన చర్చకు దారితీశాయి. ముందస్తు అంచనాలు, సర్వేలు, రాజకీయ విశ్లేషకుల అంచనాలు అన్నింటినీ తలకిందులు చేస్తూ ఎన్డీయే ఆశ్చర్యకరంగా 200కుపైగా సీట్లు గెలుచుకోవడం మహాకూటమిలో తీవ్ర అసంతృప్తి, షాక్కు కారణమైంది. అయితే ఈ ఫలితాలపై ప్రత్యక్ష వ్యాఖ్యలు చేయడానికి కూడా మహాకూటమి నాయకులు విముఖత చూపుతున్న సమయంలో, కేంద్ర ఆర్థికమంత్రి నిర్మలా సీతారామన్ భర్త పరకాల ప్రభాకర్ మాత్రం ఎక్స్లో వరుసగా 12 పోస్టులతో ఎన్నికల లెక్కలను డీకోడ్ చేస్తూ పెద్ద దుమారం రేపారు. ఆయన లేవనెత్తిన ప్రశ్నలు ప్రస్తుతం దేశవ్యాప్తంగా పెద్ద చర్చకు కారణమయ్యాయి.
పరకాల ప్రభాకర్ ప్రధానంగా ఈసీ ప్రకటించిన ఓటర్ల సంఖ్య, పోలింగ్ శాతం, లెక్కించబడిన ఓట్ల మొత్తం మధ్య ఉన్న వ్యత్యాసాలపై దృష్టి పెట్టారు. మొదటగా ఆయన ప్రశ్నించిన విషయం ఏమిటంటే — బీహార్లో పోలైన మొత్తం ఓట్లకంటే 1,77,673 ఓట్లు ఎక్కువగా ఎలా లెక్కించబడ్డాయి? ఈసీ ఇలాంటి విషయంపై దేశానికి జవాబు ఇవ్వాల్సిన అవసరం ఉందని ఆయన స్పష్టం చేశారు. బీహార్ ఎన్నికలకు సంబంధించి ఈసీ విడుదల చేసిన పలు ప్రెస్ నోట్లలో ఓటర్ల మొత్తం సంఖ్య మారడం, కొత్త లెక్కలు రావడం ఆయనకు అత్యంత అనుమానాస్పదంగా అనిపించింది.
30 సెప్టెంబర్ 2025 నాటి ఈసీ ప్రెస్ నోట్ ప్రకారం బీహార్లో మొత్తం ఓటర్లు 7.42 కోట్లు ఉన్నారని పేర్కొన్నారు. అయితే వాస్తవిక సంఖ్యలు అందుబాటులో ఉన్నప్పటికీ ఎందుకు ఈ ఉజ్జాయింపు లెక్కనిచ్చారో పరకాల ప్రశ్నించారు. ఆ తరువాత అక్టోబర్ 6 తేదీన విడుదలైన ప్రెస్ నోట్లో 1.63 లక్షల సర్వీస్ ఓటర్లను జోడించి ఈ సంఖ్య 7,43,55,976గా మార్చబడింది. అనంతరం నవంబర్ 11న మరోసారి మొత్తం ఓటర్ల సంఖ్యను 7,45,26,858గా ప్రకటించడంలోనూ పరకాలకు స్పష్టత లేదని తెలిపారు.
తరువాత పోలింగ్ శాతంలో కూడా లోపాలున్నాయని ఆయన అభిప్రాయపడ్డారు. ఎన్నికల అనంతరం ఈసీ మొదట 66.91% పోలింగ్ నమోదైందని ప్రకటించగా, మరుసటి రోజే దానిని 67.13%కు సవరించడం సహజమేనా అన్న ప్రశ్నను ఆయన లేవనెత్తారు. ఈ శాతాన్ని కొత్తగా ప్రకటించిన మొత్తం ఓటర్ల సంఖ్యపై లెక్కిస్తే 5,00,29,880 ఓట్లు మాత్రమే పోలై ఉండాలి. కానీ వాస్తవంగా 243 నియోజకవర్గాల నుండి లెక్కించబడిన ఓట్ల మొత్తం 5,02,07,553గా ఉందని ఆయన వివరించారు. రెండు లెక్కల మధ్య ఉన్న వ్యత్యాసం 1,77,673 ఓట్లు ఎలా వచ్చింది? దీనిపై ఈసీ స్పష్టమైన వివరణ ఇవ్వాలని ఆయన పునరుద్ఘాటించారు.
పరకాల ప్రకారం, ఇంత కీలకమైన విషయాల్లో ఈసీ పారదర్శకత ప్రదర్శించకపోవడం దేశ ప్రజలు ఆందోళన చెందే విషయం. ప్రతి నియోజకవర్గంలో పోలైన ఓట్ల స్థూల సంఖ్యను ఈసీ ఎందుకు వెల్లడించలేదని, ఎలాంటి ఇబ్బందులు ఉన్నాయని ఆయన ప్రశ్నించారు. పోలింగ్ గణాంకాలు, కౌంటింగ్ లెక్కలు, ఓటర్ల సంఖ్య లాంటి అంశాలు ఎన్నికల విశ్వసనీయతలో కీలక పాత్ర పోషిస్తాయి. అలాంటప్పుడు ఈసీ లెక్కల్లో ఎందుకు ఇంత తేడా? అనే విషయంపై ఆయన ప్రజల్లో సందేహం స్పష్టంగా వ్యక్తం చేశారు.
ఈ లెక్కల గందరగోళం వెనుక కారణం ఏమిటి? అని పరకాల మరింత తీవ్రమైన ప్రశ్నలు వేశారు. ఇది కేవలం అమాయకమైన గందరగోళమా? లేక ఈసీ అసమర్థతా? లేక నిర్లక్ష్యమా? లేదా ఏదైనా పార్టీకి లాభం చేకూర్చే ధోరణితో చేసిన చర్యలా? లేదా చట్టం, బాధ్యతల పట్ల నిర్లక్ష్యంతో కూడిన అహంకారమా? అని ఆయన నిలదీశారు. ఈ గందరగోళ పరిస్థితిలో లాభం పొందిన వారు తమ విజయంపై నిస్సందేహంగా నమ్మకం కలిగి ఉన్నారా? ప్రజల తీర్పు నిజంగానే తమకే అనుకూలంగా వచ్చిందని భావిస్తున్నారా? అని ప్రశ్నించారు.
బీహార్ ఎన్నికల ఫలితాల్లో ఈసీ గణాంకాల వ్యత్యాసంపై పరకాల ప్రభాకర్ విశ్లేషణ
పరకాల ప్రభాకర్ లేవనెత్తిన ఈ ప్రశ్నలు ఇప్పుడు బీహార్ ఎన్నికల ఫలితాలపై కొత్త చర్చకు దారితీశాయి. రాజకీయ వర్గాలు, విశ్లేషకులు ఈ అంశాలను సీరియస్గా తీసుకుంటున్నారు. ఎన్నికల లెక్కలు, గణాంకాలు, పోలింగ్ శాతం వంటి కీలక విషయాల్లో ఈసీ మరింత పారదర్శకతను చూపాలని ప్రజలు కోరుతున్నారు. బీహార్ ఫలితాలు నిజంగానే ప్రజా తీర్పా? లేక లెక్కల లోపాల ప్రభావమా? అన్న ప్రశ్నకు సమాధానం ఇచ్చే బాధ్యత ఇప్పుడు ఈసీపైనే ఉందని పరకాల అభిప్రాయపడ్డారు.
ఈ కథనాన్ని Digital Prime News ప్రత్యేకంగా అందిస్తోంది.
తాజా రాజకీయ విశ్లేషణలు, స్పోర్ట్స్ అప్డేట్స్, ఎంటర్టైన్మెంట్, జాతీయ-అంతర్జాతీయ వార్తల కోసం మా వెబ్సైట్ను సందర్శించండి.
Visit: www.digitalprimenews.in
YouTube: Digital Prime News
Facebook: Digital Prime News
Twitter / X: @DigitalPrimeNews
Instagram: @digitalprimenews
ఫాలో అవ్వండి – నిజమైన వార్తలు, వేగంగా అందించే Digital Prime Newsతో కలసి ఉండండి!
COMMENTS