హైదరాబాద్ నగరంలో మరో అగ్నిప్రమాదం భయాందోళన కలిగించింది. ఇటీవలే చార్మినార్ సమీపంలోని గుల్జార్ హౌస్లో జరిగిన అగ్ని ప్రమాద ఘటనపై ప్రజలు ఇంకా చర్చించుకు
హైదరాబాద్ నగరంలో మరో అగ్నిప్రమాదం భయాందోళన కలిగించింది. ఇటీవలే చార్మినార్ సమీపంలోని గుల్జార్ హౌస్లో జరిగిన అగ్ని ప్రమాద ఘటనపై ప్రజలు ఇంకా చర్చించుకుంటుండగానే, తాజాగా హైదర్గూడలో గ్యాస్ పైపు లీక్తో ప్రమాదం చోటు చేసుకుంది.
హైదర్గూడలోని సమృద్ధి ఎస్ఆర్ యూనిగ్యాస్ బంక్లో గ్యాస్ పైపుకు వెల్డింగ్ పనులు జరుగుతుండగా అకస్మాత్తుగా మంటలు చెలరేగాయి. ప్రాథమిక సమాచారం ప్రకారం, గ్యాస్ పైప్ లీకవడం, దానికి వెల్డింగ్ చేయడం వల్లనే ఈ ప్రమాదం జరిగినట్లు తెలుస్తోంది. మంటలు ఒక్కసారిగా ఎగసిపడి ఆ ప్రాంతాన్ని పూర్తిగా కమ్మేశాయి.
ఈ సమయంలో బంక్లో పనిచేస్తున్న కార్మికులు గాలివానలా బయటకు పరుగులు పెట్టారు. కానీ మాధవ్, గోపి అనే ఇద్దరు కార్మికులు తీవ్రంగా గాయపడ్డారు. వారి పరిస్థితి విషమంగా ఉందని ఆసుపత్రి వర్గాలు వెల్లడించాయి. ప్రమాదాన్ని గమనించిన ఇతర సిబ్బంది వెంటనే అగ్నిమాపక శాఖకు సమాచారం ఇచ్చారు. వెంటనే స్పందించిన ఫైర్ సిబ్బంది సంఘటన స్థలానికి చేరుకుని మంటలను అదుపులోకి తెచ్చారు.
ఇది జరిగేంతవరకు బంక్ ప్రాంతం పొగతో కమ్మిపోయింది. స్థానికులు భయంతో పరుగులు పెట్టారు. పోలీసులు సంఘటన స్థలానికి చేరుకుని పరిసరాలను ఖాళీ చేయించారు. గాయపడిన కార్మికులను సమీపంలోని ప్రభుత్వ ఆసుపత్రికి తరలించారు. వైద్యులు వారి ఆరోగ్య పరిస్థితి మరింత జాగ్రత్తగా పరిశీలిస్తున్నారు.
ప్రమాదంపై హైదర్గూడ పోలీస్ స్టేషన్లో కేసు నమోదు అయ్యింది. ప్రమాదానికి గల అసలు కారణాలపై పోలీసులు, ఫైర్ శాఖ సంయుక్తంగా దర్యాప్తు చేపట్టారు.
అగ్నిమాపక శాఖ అధికారులు ప్రజలకు హెచ్చరికలు జారీ చేశారు. ముఖ్యంగా పెట్రోల్, డీజిల్, గ్యాస్ వంటి మంటలతో ముడిపడిన పదార్థాలతో పని చేసే ప్రదేశాల్లో తగినంత జాగ్రత్తలు తీసుకోవాలని సూచించారు. ఫైర్ సేఫ్టీ ప్రమాణాలను తప్పనిసరిగా పాటించకపోతే ఈ తరహా ప్రమాదాలు మరింత తీవ్రంగా మారే అవకాశముందని అధికారులు హెచ్చరించారు.
COMMENTS