తమిళనాడు అసెంబ్లీలో గవర్నర్ ఆర్.ఎన్. రవి ప్రసంగం మధ్యలోనే వాకౌట్. జాతీయ గీతం, ప్రసంగ పాఠంపై ప్రభుత్వం–రాజ్ భవన్ మధ్య ఘర్షణ. RN Ravi Tamil Nadu Govern
తమిళనాడు అసెంబ్లీలో గవర్నర్ ఆర్.ఎన్. రవి ప్రసంగం మధ్యలోనే వాకౌట్. జాతీయ గీతం, ప్రసంగ పాఠంపై ప్రభుత్వం–రాజ్ భవన్ మధ్య ఘర్షణ.
RN Ravi Tamil Nadu Governor Walkout: తమిళనాడు రాజకీయాల్లో మరోసారి గవర్నర్–ప్రభుత్వ ఘర్షణ తీవ్ర రూపం దాల్చింది. మంగళవారం తమిళనాడు అసెంబ్లీ ప్రారంభ సమావేశంలో గవర్నర్ ఆర్.ఎన్. రవి తన ప్రసంగాన్ని మధ్యలోనే ఆపేసి సభ నుంచి వాకౌట్ చేయడం రాజకీయంగా సంచలనంగా మారింది. ప్రతి ఏటా అసెంబ్లీ తొలి సమావేశంలో గవర్నర్ ప్రభుత్వం సిద్ధం చేసిన ప్రసంగాన్ని చదవడం సంప్రదాయం. అయితే వరుసగా మూడో ఏడాదీ ఈ సంప్రదాయానికి భిన్నంగా గవర్నర్ వ్యవహరించడంతో డీఎంకే ప్రభుత్వం తీవ్ర అసంతృప్తి వ్యక్తం చేసింది.
ఉదయం 9:30 గంటలకు సభ ప్రారంభమైన వెంటనే స్పీకర్ ఎం.అప్పావు, కేబినెట్ ఆమోదించిన ప్రసంగ పాఠాన్ని మాత్రమే గవర్నర్ చదవాలని, రాజ్యాంగ పరిమితుల్లోనే వ్యవహరించాలని సూచించారు. దీనిపై గవర్నర్ ఆర్.ఎన్. రవి తీవ్ర అభ్యంతరం వ్యక్తం చేశారు. తన ప్రసంగాన్ని అడ్డుకుంటున్నారని, జాతీయ గీతానికి తగిన గౌరవం ఇవ్వడం లేదని, తన మైక్‌ను పదే పదే స్విచ్ ఆఫ్ చేస్తున్నారని సభలోనే ఆరోపించారు. ఈ పరిణామాలతో అసంతృప్తి చెందిన గవర్నర్ ప్రసంగాన్ని పూర్తి చేయకుండానే సభ నుంచి బయటకు వెళ్లిపోయారు.
గవర్నర్ వాకౌట్ అనంతరం రాజ్ భవన్ (లోక్ భవన్) ఒక సుదీర్ఘ ప్రకటన విడుదల చేసి రాష్ట్ర ప్రభుత్వంపై తీవ్రమైన ఆరోపణలు చేసింది. ప్రభుత్వం సిద్ధం చేసిన ప్రసంగ పాఠంలో వాస్తవ విరుద్ధమైన, ప్రజలను తప్పుదోవ పట్టించే అంశాలు ఉన్నాయని పేర్కొంది. రాష్ట్రానికి ₹12 లక్షల కోట్ల పెట్టుబడులు వచ్చాయని ప్రభుత్వం చెబుతున్నది కేవలం అబద్ధమని, అనేక పెట్టుబడి ఒప్పందాలు కాగితాలకే పరిమితమయ్యాయని విమర్శించింది. అలాగే మహిళలపై నేరాలు, పోక్సో కేసులు పెరిగాయని, తమిళనాడు ‘ఆత్మహత్యల రాజధాని’గా మారుతున్నా ప్రభుత్వం పట్టించుకోవడం లేదని ఆరోపించింది.
జాతీయ గీతం విషయంలోనూ రాజ్ భవన్ తీవ్ర అభ్యంతరం తెలిపింది. సెషన్ ప్రారంభంలో రాష్ట్ర గీతం ‘తమిళ్ తాయి వాజ్తు’ పాడుతూ జాతీయ గీతాన్ని విస్మరించడం రాజ్యాంగ విరుద్ధమని పేర్కొంది. దీనిపై ప్రభుత్వం ఘాటుగా స్పందించింది. ముఖ్యమంత్రి ఎం.కె. స్టాలిన్ గవర్నర్ తీరును తీవ్రంగా ఖండించారు. శాసనసభ సంప్రదాయాలను గవర్నర్ గౌరవించడం లేదని విమర్శించారు. డీఎంకే వ్యవస్థాపకుడు అన్నాదురై చెప్పిన “మేకకు గడ్డం, రాష్ట్రానికి గవర్నర్ అనవసరం” అన్న వ్యాఖ్యలను గుర్తు చేస్తూ స్టాలిన్ తీవ్ర వ్యాఖ్యలు చేశారు.
గవర్నర్ ప్రసంగించకపోయినా, ప్రభుత్వం సిద్ధం చేసిన ప్రసంగాన్ని సభ రికార్డుల్లో చేర్చేలా సీఎం స్టాలిన్ తీర్మానం ప్రవేశపెట్టి ఆమోదింపజేశారు. గత మూడేళ్లుగా జాతీయ గీతం, ప్రసంగ అంశాలపై గవర్నర్–ప్రభుత్వం మధ్య వివాదాలు కొనసాగుతున్నాయి. అసెంబ్లీ ఎన్నికలకు కేవలం మూడు నెలల సమయం ఉండటంతో ఈ ఘటన తమిళనాడు రాజకీయాలను మరింత వేడెక్కిస్తోంది.
ఈ కథనాన్ని Digital Prime News ప్రత్యేకంగా అందిస్తోంది.
తాజా రాజకీయ విశ్లేషణలు, స్పోర్ట్స్ అప్‌డేట్స్, ఎంటర్టైన్మెంట్, జాతీయ-అంతర్జాతీయ వార్తల కోసం మా వెబ్‌సైట్‌ను సందర్శించండి.
Visit: www.digitalprimenews.in
YouTube: Digital Prime News
Facebook: Digital Prime News
Twitter / X: @DigitalPrimeNews
Instagram: @digitalprimenews
ఫాలో అవ్వండి – నిజమైన వార్తలు, వేగంగా అందించే Digital Prime Newsతో కలసి ఉండండి!
COMMENTS