హైడ్రా, రెవెన్యూ అధికారుల తీరుపై హైకోర్టు తీవ్ర ఆగ్రహం వ్యక్తం చేసింది. ప్రైవేట్ వ్యక్తులు కాదు, అధికారులే కోర్టును తప్పుదోవ పట్టిస్తున్నారని జస్టిస్
హైడ్రా, రెవెన్యూ అధికారుల తీరుపై హైకోర్టు తీవ్ర ఆగ్రహం వ్యక్తం చేసింది. ప్రైవేట్ వ్యక్తులు కాదు, అధికారులే కోర్టును తప్పుదోవ పట్టిస్తున్నారని జస్టిస్ ఎన్వీ శ్రవణ్ కుమార్ వ్యాఖ్యానించారు.
హైదరాబాద్లో హైడ్రా (HYDRA) చర్యలపై తెలంగాణ హైకోర్టు మరోసారి తీవ్ర ఆగ్రహం వ్యక్తం చేసింది. కొండాపూర్ సర్వే నంబర్ 60లోని ప్రైవేట్ స్థలానికి సంబంధించిన కాంపౌండ్ గోడ కూల్చివేత వ్యవహారంపై విచారణ చేపట్టిన జస్టిస్ ఎన్వీ శ్రవణ్ కుమార్ కీలక వ్యాఖ్యలు చేశారు. ప్రైవేట్ వ్యక్తులు కోర్టులను తప్పుదోవ పట్టించడం లేదని, ప్రభుత్వ అధికారులే తప్పుడు సమాచారం అందిస్తూ న్యాయస్థానాన్ని తప్పుదోవ పట్టిస్తున్నారని ధర్మాసనం తీవ్రంగా వ్యాఖ్యానించింది. ఇటీవల హైడ్రా వ్యవహారంపై జస్టిస్ అనిల్ కుమార్ చేసిన వ్యాఖ్యలు, ఇచ్చిన ఉత్తర్వులు పూర్తిగా సమర్థనీయమేనని కూడా స్పష్టం చేసింది.
కొండాపూర్లోని సర్వే నంబర్ 60లో ఉన్న 350 చదరపు గజాల ప్రైవేట్ స్థలానికి చెందిన ప్రహరీ గోడ, వాచ్మన్ గదిని హైడ్రా కూల్చివేయడాన్ని సవాలు చేస్తూ దాఖలైన పిటిషన్పై విచారణ సందర్భంగా రెవెన్యూ శాఖ, హైడ్రా మధ్య సమన్వయం లేకపోవడం స్పష్టంగా కనిపిస్తోందని కోర్టు పేర్కొంది. గతంలో ఇదే భూవివాదంపై హైకోర్టు సర్వే నంబర్ 59 ప్రభుత్వ భూమి, సర్వే నంబర్ 60 పట్టా భూమి అని స్పష్టంగా పేర్కొన్నప్పటికీ, ఆ ఉత్తర్వులను అధికారులు పట్టించుకోలేదని కోర్టు అభిప్రాయపడింది.
విచారణలో శేరిలింగంపల్లి తహసీల్దార్ వ్యక్తిగతంగా హాజరుకాగా, ప్రభుత్వ భూమి పరిరక్షణ కోసం మాత్రమే సమాచారం ఇచ్చామని, కూల్చివేతలు చేపట్టాలని సూచించలేదని ప్రభుత్వ తరఫు న్యాయవాది తెలిపారు. అయితే హైడ్రా అధికారులు మాత్రం రెవెన్యూ శాఖ సమాచారం ఆధారంగానే చర్యలు చేపట్టామని కోర్టుకు వివరించారు. దీనిపై స్పందించిన న్యాయమూర్తి, ప్రైవేట్ స్థలాన్ని ప్రభుత్వ భూమిగా ఎలా నిర్ధారించారని, ఎలాంటి సర్వే లేకుండా, నోటీసులు ఇవ్వకుండా కూల్చివేతలు ఎలా చేపట్టారని అధికారులను ప్రశ్నించారు.
కోర్టు ఉత్తర్వులను పదేపదే ఉల్లంఘించడం పరిపాలనా వ్యవస్థలోని వైఫల్యానికి నిదర్శనమని ధర్మాసనం వ్యాఖ్యానించింది. ఆక్రమణ ఉందని భావించినా చట్టప్రకారం ముందుగా నోటీసులు జారీ చేసి, వివరణకు అవకాశం ఇచ్చిన తర్వాతే చర్యలు తీసుకోవాలని స్పష్టం చేసింది. హైడ్రా అధికారులు విధివిధానాలు పాటించకుండా, కోర్టు ఆదేశాలను కూడా పక్కనబెట్టి వ్యవహరిస్తున్నారన్న ఆందోళన వ్యక్తం చేసింది.
ఈ కేసులో జరిగిన అన్ని పరిణామాలను తేదీల వారీగా పూర్తి వివరాలతో కౌంటర్ అఫిడవిట్ రూపంలో సమర్పించాలని సంబంధిత అధికారులను హైకోర్టు ఆదేశించింది. తదుపరి విచారణను ఆగస్టు 6కు వాయిదా వేస్తూ, అప్పటి వరకు ప్రతి విచారణకు శేరిలింగంపల్లి తహసీల్దార్ వ్యక్తిగతంగా హాజరుకావాలని ఆదేశించింది. ఈ వ్యాఖ్యలు హైడ్రా చర్యలపై కొనసాగుతున్న న్యాయపరమైన పరిశీలనకు మరింత ప్రాధాన్యం తీసుకొచ్చాయి.
ఈ వార్తలు కూడా చదవండి..
నేటితో ITR గడువు ముగింపు.. ఫైల్ చేయకపోతే రూ.5,000 జరిమానా!
ట్రంప్ భారీ షాక్.. అమెరికాలో ఉద్యోగం చేయాలంటే రూ.90 లక్షల ఫీజా?
పెద్ది సుదర్శన్రెడ్డి మృతి.. సీఎం రేవంత్ సహా పలువురు నేతల తీవ్ర సంతాపం
ఈ కథనాన్ని Digital Prime News ప్రత్యేకంగా అందిస్తోంది.
తాజా రాజకీయ విశ్లేషణలు, స్పోర్ట్స్ అప్డేట్స్, ఎంటర్టైన్మెంట్, జాతీయ-అంతర్జాతీయ వార్తల కోసం మా వెబ్సైట్ను సందర్శించండి.
Visit: www.digitalprimenews.in
YouTube: Digital Prime News
Facebook: Digital Prime News
Twitter / X: @DigitalPrimeNews
Instagram: @digitalprimenews
COMMENTS