22ఏ నిషేధిత భూముల సమస్యకు పరిష్కారం కోసం తెలంగాణ ప్రభుత్వం కొత్త మార్గదర్శకాలు రూపొందిస్తోంది. ఉన్నతస్థాయి కమిటీ, భూముల పునఃపరిశీలనపై కసరత్తు. తెలంగా
22ఏ నిషేధిత భూముల సమస్యకు పరిష్కారం కోసం తెలంగాణ ప్రభుత్వం కొత్త మార్గదర్శకాలు రూపొందిస్తోంది. ఉన్నతస్థాయి కమిటీ, భూముల పునఃపరిశీలనపై కసరత్తు.
తెలంగాణలో 22-A నిషేధిత భూముల సమస్యకు పరిష్కారం చూపేందుకు రాష్ట్ర ప్రభుత్వం కసరత్తు ప్రారంభించింది. భూ సమస్యలకు శాశ్వత పరిష్కారం చూపే దిశగా కొత్త మార్గదర్శకాలను రూపొందించడంతో పాటు, భూముల వివరాలను మరోసారి పరిశీలించడం, అధికారాల వికేంద్రీకరణ, అవసరమైన చట్ట సవరణలపై రెవెన్యూ శాఖ దృష్టి సారించింది.
సీఎం ప్రకటనతో మొదలైన కసరత్తు
22-A నిషేధిత భూముల సమస్యను నెల రోజుల్లో పరిష్కరించేందుకు చర్యలు తీసుకుంటామని ముఖ్యమంత్రి రేవంత్ రెడ్డి అసెంబ్లీలో ప్రకటించిన నేపథ్యంలో అధికారులు కార్యాచరణ రూపొందిస్తున్నారు. సీఎం ప్రస్తావించిన అంశాల ఆధారంగా రెవెన్యూ అధికారులకు స్పష్టమైన విధివిధానాలు రూపొందించే ప్రక్రియ కొనసాగుతోంది.
ఈ నేపథ్యంలో రెవెన్యూ శాఖ కార్యదర్శి లోకేష్ కుమార్, ఐజీ రాజీవ్గాంధీ హనుమంతు ముఖ్యమంత్రి కార్యాలయ అధికారులతో సమావేశమై భూ సమస్యల పరిష్కారంపై చర్చించినట్లు సమాచారం. లోకేష్ కుమార్ అధ్యక్షతన ఉన్నతస్థాయి కమిటీని ఏర్పాటు చేయాలని ప్రభుత్వం నిర్ణయించినట్లు తెలుస్తోంది.
కమిటీ ఏర్పాటైన అనంతరం 22-Aతో పాటు ఇతర భూ సమస్యలను అంశాల వారీగా పరిశీలించి, ప్రాధాన్యత క్రమంలో పరిష్కారానికి అవసరమైన నిర్ణయాలు తీసుకునే అవకాశం ఉంది.
భూముల వివరాలపై మరోసారి తనిఖీ
సీఎం ప్రకటన నేపథ్యంలో జిల్లాల వారీగా భూముల వివరాలను రెవెన్యూ యంత్రాంగం మరోసారి సేకరిస్తోంది. నిషేధిత భూములతో పాటు ఇతర వివాదాస్పద భూములు, వివిధ కేటగిరీలకు చెందిన భూముల విస్తీర్ణం వంటి వివరాలను పరిశీలిస్తున్నారు.
22-A సమస్య పరిష్కారంలో అధికారాల వికేంద్రీకరణకు ప్రాధాన్యం ఇవ్వాలని ప్రభుత్వం భావిస్తున్నట్లు సమాచారం. కలెక్టర్ల స్థాయిలో ఉన్న కొన్ని నిర్ణయాధికారాలను ఆర్డీవోలు, సబ్ కలెక్టర్లకు అప్పగించే అంశంపై రెవెన్యూ వర్గాల్లో చర్చ జరుగుతోంది.
22-A జాబితాల్లో గందరగోళానికి చెక్?
ప్రస్తుతం 22-A భూములకు సంబంధించి వివిధ శాఖల వద్ద వేర్వేరు జాబితాలు ఉండటం వల్ల భూ యజమానులు, కొనుగోలుదారులు ఇబ్బందులు ఎదుర్కొంటున్నారని రెవెన్యూ వర్గాలు చెబుతున్నాయి. ఈ నేపథ్యంలో ఐజీఆర్ఎస్, రెవెన్యూ శాఖల వద్ద ఒకే విధమైన ప్రామాణిక జాబితాను నిర్వహించే అంశాన్ని ప్రభుత్వం పరిశీలిస్తున్నట్లు సమాచారం.
భూమి సర్వే నంబర్, విస్తీర్ణం, కేటగిరీతో పాటు ఆ భూమిని 22-A జాబితాలో చేర్చిన అధికారి పేరు, హోదా, కారణాలు, సంబంధిత ఆధారాలు, కోర్టు ఉత్తర్వులు, ప్రభుత్వ ఉత్తర్వులు వంటి వివరాలను ఒకే చోట నమోదు చేయాలనే ప్రతిపాదనపై కూడా చర్చ జరుగుతోంది. దీనివల్ల నిర్ణయ ప్రక్రియలో పారదర్శకత, అధికారుల జవాబుదారీతనం పెరిగే అవకాశం ఉందని నిపుణులు అభిప్రాయపడుతున్నారు.
22-A జాబితాలో మార్పులు లేదా చేర్పులు చేయాల్సి వచ్చినప్పుడు బాధితులకు ముందుగా నోటీసులు ఇవ్వడం, విచారణ నిర్వహించడం, కారణాలను వివరిస్తూ స్పీకింగ్ ఆర్డర్ జారీ చేయడం వంటి విధానాలను కొత్త మార్గదర్శకాల్లో చేర్చే అవకాశం ఉన్నట్లు తెలుస్తోంది.
వక్ఫ్, దేవాదాయ, అటవీ భూములపై స్పష్టత
22-Aలోని వివిధ కేటగిరీల విషయంలోనూ స్పష్టమైన మార్గదర్శకాలు అవసరమని భూ చట్టాల నిపుణులు చెబుతున్నారు. వక్ఫ్, దేవాదాయ, అటవీ భూములకు సంబంధించిన వివరాలను సంబంధిత గెజిట్ ప్రకటనలు, అధికారిక రికార్డుల ఆధారంగానే 22-A జాబితాలో చేర్చాల్సి ఉంటుందని వారు పేర్కొంటున్నారు.
అలాగే కోర్టులు కొన్ని భూములను 22-A జాబితా నుంచి తొలగించాలని ఆదేశించినప్పటికీ, కొన్ని ప్రాంతాల్లో అవే భూములు తిరిగి నిషేధిత జాబితాలో కనిపిస్తున్న సందర్భాలు ఉన్నాయని నిపుణులు చెబుతున్నారు. 1958కు ముందు అసైన్ చేసిన భూములు, మాజీ సైనికులు, స్వాతంత్ర్య సమరయోధులకు సంబంధించిన భూముల విషయంలోనూ స్పష్టమైన విధివిధానాలు అవసరమనే అభిప్రాయాలు వ్యక్తమవుతున్నాయి.
భూభారతిలోనూ మార్పులు అవసరమా?
కొత్త మార్గదర్శకాలు అమల్లోకి వచ్చిన తర్వాత వాటికి అనుగుణంగా భూభారతి సాఫ్ట్వేర్లోనూ మార్పులు చేయాల్సి ఉంటుందని భూ చట్టాల నిపుణుడు భూమి సునీల్ పేర్కొన్నారు. 22-A జాబితాలను గ్రామాల వారీగా ప్రజలకు అందుబాటులో ఉంచి, బాధితుల అభిప్రాయాలను సేకరిస్తే సమస్యలను మరింత సమర్థవంతంగా పరిష్కరించవచ్చని సూచించారు.
అలాగే 22-A జాబితా నుంచి తొలగించిన భూముల వివరాలను కూడా గ్రామాల వారీగా ప్రజలకు అందుబాటులో ఉంచాలని ఆయన సూచించారు. ప్రభుత్వం ప్రతిపాదిస్తున్న మార్గదర్శకాలు, ఉన్నతస్థాయి కమిటీ నిర్ణయాలు అమల్లోకి వచ్చిన తర్వాత 22-A భూముల వివాదాలకు ఎంతవరకు పరిష్కారం లభిస్తుందన్నది కీలకంగా మారింది.
ఈ వార్తలు కూడా చదవండి..
ఇద్దరి ఆస్తులపై విచారణ జరపాలి.. రేవంత్కు కేటీఆర్ ఛాలెంజ్
ధరణి, భూభారతిపై విచారణకు సిద్ధమా? రేవంత్కు హరీశ్ సవాల్
కీసర పీఎస్లో ఏసీబీ ట్రాప్.. సీఐ, ఎస్ఐ అరెస్ట్
ఈ కథనాన్ని Digital Prime News ప్రత్యేకంగా అందిస్తోంది.
తాజా రాజకీయ విశ్లేషణలు, స్పోర్ట్స్ అప్డేట్స్, ఎంటర్టైన్మెంట్, జాతీయ-అంతర్జాతీయ వార్తల కోసం మా వెబ్సైట్ను సందర్శించండి.
Visit: www.digitalprimenews.in
YouTube: Digital Prime News
Instagram: DigitalPrimeNews
Facebook: Digital Prime News
Twitter / X: @DigitalPrimeNews
COMMENTS